A atleta galega Ana Peleteiro manifestou o seu desexo de ser nai a curto prazo e así o reflectiu no contrato que a liga ao seu patrocinador, a marca alemá de roupa deportiva Adidas, que reaccionou de xeito positivo ante os desexos da galega cando renovou o contrato o pasado setembro. "Javier Zapata, en nome da firma, díxome: Non vai repercutir nada no teu contrato aínda que un ano quedes embarazada e non compitas", revelou.
Peleteiro quixo ser sincera desde o principio coa marca á que "debe todo" e que desde os seus inicios nas pistas confiou nela. "Foron o meu principal aliado", dixo nunha entrevista tras o acto de presentación da campaña 'Dedícate 1 minuto' da Asociación Española contra o Cancro.
"Aínda que esteas embarazada podes seguir adestrando, e unha vez que se dá a luz aos 40 días podes empezar a exercitar"
A campioa de España de triplo salto ten claro que "algunhas lesións poden ser peores que un embarazo" xa que presentan prazos de recuperación máis longos como, por exemplo, un tendón de Aquiles que se recobra en seis meses. "É absurdo que rescindan o contrato por estar embarazada e non pase nada se tes unha lesión de longa duración".
A atleta, que quedou sexta en triplo salto nos Mundiais de Doha sen estar en óptimas condicións físicas, ten claro os prazos das gestantes. "Aínda que esteas embarazada podes seguir adestrando e unha vez que se dá a luz aos 40 días podes empezar a exercitar".
"Se quero loitar polos dereitos da muller, non podo esconder iso, a muller ten dereito a ser nai cando lle apeteza e non perder os seus dereitos" e recordou á tenista Serena Williams que soubo "protexer o embarazo" e anuncialo antes.
E mostrouse en desacordo coas formas que usou a velocista norteamericana Allyson Felix co seu esponsor (Nike) ao comunicarlle que fora nai: "Se queres loitar polos dereitos da muller non podes esperar a dar a luz, iso non axuda ás mulleres".
