A raíña Letizia inaugurou este mércores a 40 edición de Fitur nunha apertura que contou cunha ampla representación de presidentes autonómicos. Dona Letizia percorreu durante hora e media varios pavillóns da Feira Internacional de Turismo, no recinto de Ifema en Madrid, e fíxoo no medio dunha grande expectación.
A Raíña vestiu para este evento un vestido de topos de manga longa con selo galego, porque é da marca Massimo Dutti, do grupo Inditex. Xa o utilizou na súa recente viaxe a Corea.
Estivo acompañada na súa visita pola ministra de Industria e Turismo, Reyes Maroto, así como pola presidenta do Congreso, Meritxell Batet; a presidenta da Comunidade de Madrid, Isabel Díaz Ayuso, e o alcalde da capital e presidente de Ifema, José Luis Martínez Almeida. Visitou os expositores de empresas españolas Hotusa, Paradores, Meliá ou Iberia, ademais de pasar polos de Madrid, Asturias, Galicia ou Navarra.
A 40 edición de Fitur estará aberta ata o vindeiro domingo e os seus organizadores esperan bater un récord de visitantes profesionais ata rozar os 150.000 e unha cifra de público similar ao ano anterior, cando houbo 110.000. Este ano danse cita na mostra 918 expositores, un 3,8% máis que en 2019, e hai 11.040 empresas de 165 países e rexións que ocupan unha superficie de 69.697 metros cadrados.
