O internacional brasileiro Roberto Firmino e a súa familia foron vítimas dun roubo na súa casa de Liverpool durante as súas vacacións de Nadal, informa este luns a prensa británica.
Os ladróns, que levaron xoias, reloxos e roupa, por un valor de 70.000 libras (80.700 euros), entraron na residencia familiar, no exclusivo barrio de Mossley Hill, ás 22.00 GMT, aproximadamente, do pasado 22 de decembro. "Aínda que os inquilinos non se atopaban na casa nese momento, para a familia resultou moi triste ver como o seu fogar sufría un furto. Pediríalle aos ladróns que fagan o correcto e entreguen canto antes aos seus donos os obxectos roubados", asegurou Steve Christian, inspector da policía de Liverpool (Merseyside Police).
Firmino, de 25 anos, e a súa familia -a súa muller e as súas dúas fillas- foron trasladados a un hotel da cidade mentres as forzas da orde investigaban os feitos. Na actualidade todos se atopan de novo no domicilio, aínda que, segundo informa a prensa británica, reforzaron a seguridade.
O brasileiro é o último dun nutrido grupo de futbolistas que foi vítima de roubos nas súas mansións no noroeste de Inglaterra nos últimos dous anos. Ademais de Firmino, nas filas do Liverpool desde verán de 2015, Wayne Rooney (Manchester United), Romelu Lukaku, Phil Jagielka e Tom Cleverley (Everton), Ángel Di María, Peter Crouch, Darren Fletcher e Emile Heskey tamén foron vítimas de asaltos nos seus domicilios.
Rouban na casa do xogador Firmino obxectos por valor de 70.000 libras
O internacional e a súa familia foron vítimas do feito na súa vivenda de Liverpool durante as súas vacacións de Nadal
