Polo menos 108 persoas morreron e 114 resultaron feridas ao descarrilar este domingo varios vagóns do tren no que viaxaban no estado de Uttar Pradesh, no norte da India. O accidente tivo lugar durante a madrugada preto da localidade de Pukhrayan, no distrito de Kanpur.
Segundo o subcomisario da Policía do distrito Pavitra Mohan Tripathi, os labores de identificación dos cadáveres están a resultar extremadamente complicados debido a que moitos dos falecidos quedaron moi desfigurados ao ser esmagados pola colisión de varios vagóns despois do descarrilamento.
O portavoz da Forza Nacional de Resposta de Desastres despregada no lugar do sinistro, Anil Shekhawat, aclarou a Efe que no sinistro víronse afectados 14 vagóns. As causas do accidente aínda non puideron ser determinadas.
En 2014 producíronse 28.360 accidentes relacionados coa rede ferroviaria india, nos que morreron 25.006 persoas
O ministro indio de Ferrocarrís, Suresh Prabhu, escribiu na súa conta de Twitter que unidades médicas móbiles trasladáronse de inmediato ao lugar e estanse repartindo víveres entre os sobreviventes que resultaron ilesos ou feridos leves. "As accións máis contundentes dentro do marco legal serán levadas a cabo contra os responsables do accidente", sentenciou Prabhu.
A rede ferroviaria india é, con 65.000 quilómetros de percorrido, a cuarta por lonxitude do mundo, detrás de Estados Unidos, Rusia e China, conta con 1,3 millóns de empregados e 12.500 trens e transporta a diario a uns 23 millóns de pasaxeiros.
Segundo o último informe difundido polo Buró Nacional de Rexistro de Crimes (NCRB) da India, en 2014 producíronse 28.360 accidentes relacionados coa rede ferroviaria india, nos que morreron 25.006 persoas, e concretou que unha das principais causas das mortes foi a colisión de trens con outros vehículos.
