O ministro alemán de Finanzas, Wolfgand Schauble, considerou que "non son suficientes" as propostas expostas por Grecia para obter un terceiro rescate dos seus socios do euro para os próximos tres anos.
"Falamos dun terceiro paquete de rescate e para iso as propostas non son suficientes", afirmou Schauble á súa chegada á reunión extraordinaria de ministros de Economía e Finanzas da eurozona que abordan as propostas de recortes de Atenas para obter un préstamo de máis de 50.000 millóns de euros ata 2018 a cambio de reformas e aforros que alcanzan uns 12.000 millóns.
O ministro alemán, que representa ao principal país acredor de Grecia, avanzou tamén que na reunión haberá "negociacións extraordinariamente difíciles".
Para Schauble as propostas que fixo o primeiro ministro de Grecia, Alexis Tsipras, "non permiten un resultado fácil", á vez que descartou a posibilidade de que haxa unha quita da débeda cos países da eurozona, o que considerou "imposible", xa que iría en contra dos tratados.
Schauble referiuse tamén á desconfianza causada entre os socios polos vaivéns da negociación nos últimos meses e as sorpresivas decisións de Atenas, como foi no caso do referendo de hai unha semana.
"O problema é que unha situación que, contra todo escepticismo, ata finais do ano pasado era esperanzadora, destruíuse de xeito impresionante nos últimos meses", agregou o ministro alemán.
Tamén destacou que "non imos poder fiarnos de promesas" de Grecia e asegurou que o seu país está decidido "a non facer cálculos que todo o mundo sabe que ninguén se cre".
Alemaña ve "insuficiente" a proposta grega
Schauble prevé unha "negociacións extraordinariamente difícil" e insiste en que non haberá unha quita da débeda. "Non imos poder fiarnos das promesas de Atenas", engade
