O Ministerio de Defensa de Rusia anulou a evacuación temporal prevista para este mércores do poboado de Niónoksa, no noroeste de Rusia, xunto ao cal o pasado día 8 explotou un mísil de cruceiro de propulsión nuclear, notificaron as autoridades locais.
"Si, efectivamente, temos información de que os militares anularon as actividades que contemplaban a saída dos veciños" de Niónoksa, dixo un portavoz da administración local, citado pola axencia interfax.
O poboado de Niónoksa, de pouco máis de medio milleiro de habitantes, atópase xunto ao polígono onde estalou o mísil de cruceiro, no que morreron cinco enxeñeiros de Rosatom, a axencia atómica de Rusia, que traballaban no proxecto. Os niveis de radiación na cidade de Severodvinsk, a uns 20 quilómetros ao leste de Niónoksa, aumentaron entre 4 e 16 veces tras a explosión do mísil de cruceiro, provisto dunha fonte isotópica de alimentación, indicou o martes o Servizo Meteorolóxico de Rusia. "... ás 12.00 hora de Moscova (09.00 GMT) do 8 de agosto de 2019 en seis de oito puntos de Severodvinsk rexistrouse un aumento da dose de radiación gama de entre 4 e 16 veces en comparación co nivel habitual para este territorio", anotou.
Aínda que os detalles do accidente e o tipo da arma non foron desvelados, algúns medios suxeriron que se trata do mísil de cruceiro Burevéstnik (Albatros), de propulsión nuclear. O día do accidente as autoridades de Severodvinsk admitiron un aumento da radiación na zona, pero subliñaron que foi temporal. Segundo unha nota do Concello, dúas horas logo de rexistrarse dito incremento, o nivel da radiación era de "0,11 microsievert por hora cun máximo permitido de 0,60 microsievert".
