O presidente de Brasil, Jair Bolsonaro, mobilizou este mércores ao seu Goberno ante o que cualificou como "un intento de incriminalo" no asasinato da activista e concelleira de Río de Janeiro Marielle Franco, tras ser mencionado na investigación do caso. A Fiscalía de Río de Janeiro asegurou este mesmo mércores que a testemuña que citou ao mandatario mentiu ao facelo.
Bolsonaro, de visita oficial en Arabia Saudita, volveu negar taxativamente calquera tipo de vinculación co homicidio da militante de esquerdas e defensora dos dereitos humanos, ocorrido o 14 de marzo de 2018, despois de que o martes a televisión Globo asegurase que unha testemuña mencionou o seu nome nesa pescuda.
Tamén accionou ao Ministerio de Xustiza para que pida á Fiscalía a apertura dunha investigación que "enterre a pantasma" que, segundo el, queren endosarlle "como mentor da morte de Marielle".
Pouco despois, a Fiscalía de Río de Janeiro apuntou que a testemuña mentiu ao citar o nome do presidente de Brasil. A fiscal Simone Sibilio, unha das responsables pola investigación, explicou nunha rolda de prensa que a verificación do testemuño en que era citado o nome do xefe de Estado con outras probas permitiu concluír que a declaración era falsa, e agregou que a testemuña poderá ser procesada por falso testemuño e obstrución á xustiza. Subliñou que o mandatario non é investigado e si vítima de acusación calumniosa.
A polémica xurdiu por mor dunha reportaxe no telexornal de máxima audiencia de Brasil, da canle Globo, contra o que cargou Bolsonaro
As investigacións do asasinato de Franco continúan abertas case 20 meses despois. Ata o momento foron detidos os dous supostos autores materiais (os expolicías Élcio Queiroz e Ronnie Lessa), pero aínda falta por determinar quen foi o autor intelectual.
A polémica xurdiu a partir dunha reportaxe do Xornal Nacional, o telexornal de máxima audiencia de Brasil, da canle Globo, emitido o martes á noite e cuxo contido foi cualificado por Bolsonaro como "xornalismo pobre, canalla e sen escrúpulos".
Fronte ao programa, o mandatario cargou duramente contra Globo ("¡Vostedes, TV Globo, todo o tempo enferman a miña vida, foder!") e acusou o gobernador de Río, Wilson Witzel, considerado ata agora un aliado, de filtrar a información á cadea.
LIVE: Mais uma matéria porca da Globo. Caso Marielle. https://t.co/GVW7KtWPVX
— Jair M. Bolsonaro (@jairbolsonaro) October 30, 2019
Este mércores, nun ton menos agresivo, volveu criticar ao que é o maior grupo audiovisual de Brasil. "Que Globo me persegue non é algo novo, persegue á miña familia, persegue aos que están ao meu lado, iso é o que está a ocorrer, Globo quere destruír a Jair Bolsonaro", afirmou.
