China iniciou a súa exploración do Sistema Solar lanzando unha misión ao Planeta Vermello. Tianwen 1 inclúe un orbitador, así como un aterrizador que contén un vehículo de exploración de superficie.
Un foguete Longa Marcha 5 E4, o vehículo de lanzamento máis grande de China, que transporta a nave espacial cunha masa de aproximadamente 5 toneladas, elevouse cara ao ceo desde a base de lanzamento Wenchang na costa da provincia de Hainan, no sur de China, ás 3.41 UTC do 23 de xullo.
Aproximadamente 36 minutos despois, a nave espacial foi enviada á órbita de transferencia Terra-Marte, embarcándose nunha viaxe de case sete meses ao Planeta Vermello, segundo a Administración Nacional do Espazo de China (CNSA). O seu destino atópase na rexión marciana de Utopia Planitia.
O nome da misión significa Preguntas ao ceo e provén dun poema escrito por Qu Yuan (aproximadamente 340-278 aC), un dos máis grandes poetas da antiga China. O nome significa a perseveranza da nación chinesa na procura da verdade e a ciencia e a exploración da natureza e o universo, dixo a CNSA.
Tianwen 1 realizará investigacións científicas sobre o chan marciano, a estrutura xeolóxica, o medio ambiente, a atmosfera e a auga. O rover, de 200 quilos, ten seis rodas e catro paneis solares, e leva media ducia de instrumentos científico, incluído radar de penetración, detector de campo magnético, de compostos de superficie, dúas cámaras e unha estación meteorolóxica. Previuse que funcione durante tres meses.
