Conmoción en Brasil polo rapto dun autobús que acabou co secuestrador morto

Un francotirador disparou contra o home que mantivo retido o vehículo catro tensas horas ► Os 37 reféns resultaron ilesos

Case 20 anos despois dun impactante secuestro dun autobús municipal en Rio de Janeiro, Brasil conmocionouse de novo este martes por un feito similar sucedido na ponte Niteroi de Rio que acabou co asaltante morto polo disparo dun francotirador e con 37 reféns ilesos.

Ás 5.26 hora local, o día aínda non despuntara en Rio cando o autocar da liña 2520 da empresa Galo Branco que une Sãou Gonçalo e Rio de Janeiro pola ponte de Niteroi era secuestrado por un mozo que se tapaba o rostro cun pano. Logo de catro tensas horas —nas que foron liberados seis pasaxeiros—, o rapto terminou cando un francotirador de elite apostado sobre un camión de bombeiros acabou coa vida do secuestrador, identificado como William Augusto da Silva, aproveitando que saíra un instante do vehículo.

O rapto fixo revivir a Brasil o traumático secuestro doutro autobús no ano 2000 en Rio de Janeiro

"O meu papel como gobernador é facer que todo funcione e así foi. Rapidamente, intentamos resolver o transtorno para a sociedade, na mellor medida do posible", dixo o gobernador de Rio, o dereitista Wilson Witzel, criticado polo seu exacerbado uso da contundencia policial para combater a criminalidade. Witzel, xuíz de carreira e antigo infante da Mariña, chegara ao lugar dos feitos en helicóptero, pouco despois da morte do asaltante, e nada máis aterrar sobre a autoestrada que alberga a ponte deu un salto e levantou o puño en sinal de vitoria.

Aínda se sabe pouco das posibles motivacións de Augusto da Silva, quen portaba unha arma de xoguete, un bidón de gasolina e un puñal. O mozo, residente en São Gonçalo, un populoso suburbio separado de Rio pola bahía de Guanabara, tiña sinais de depresión, segundo testemuños recollidos pola prensa local.

O asaltante faleceu ás 10.35 hora local a camiño do hospital, ao que chegou con parada cardiorrespiratoria polos disparos policiais. Os 37 pasaxeiros do autobús resultaron ilesos. Só se rexistrou o desmaio dunha muller froito da tensión vivida.

"Hoxe non haberá bágoas da familia de ningún inocente", dixo Bolsonaro, quen asegurou que "non hai que ter pena" por que un bandido morra

O presidente de Brasil, Jair Bolsonaro, usou o Twitter para dar os parabéns aos axentes: "Criminal neutralizado e ningún refén ferido. Hoxe non haberá bágoas da familia de ningún inocente". Bolsonaro, antigo capitán do Exército brasileiro, expresou tamén que "non hai que ter pena" por que un bandido morra debido á acción de francotiradores e recordou o traumático secuestro da liña de autobús 174 sucedido o 12 de xuño de 2000 en Rio de Janeiro.

Naquel episodio, inmortalizado polo cineasta José Padilha no filme-documental Ônibus 174, faleceron o secuestrador, Sandro Barbosa do Nascimento —un mozo sobrevivente dunha matanza parapolicial contra menores da rúa—, e unha refén.

O presidente brasileiro celebrou a intervención do Batallón de Operacións Especiais (Bope) de Rio de Janeiro, un grupo de elite da policía que conta con francotiradores. O Bope foi tamén inmortalizado nun dos maiores éxitos internacionais do cine brasileiro: a película Tropa de Elite (2007), do propio Padilha.