O desbordamento dun río no sur de Italia deixa un total de dez mortos e once feridos, cinco deles graves, confirmaron este luns a EFE fontes do departamento de Protección civil.
Os equipos de Protección civil sinalaran nun primeiro momento que o número de falecidos era de once, pero logo dixeron que se trtara dun erro e corrixiron a cifra a dez.
Hai ademais once feridos que están hospitalizados en distintos centros do país, dos que cinco se atopan graves.
As crecidas do torrente danse só no inverno e nunca pasara nesta época do ano
As mesmas fontes aseguraron que xa acabaron os labores de procura de desaparecidos porque as tres persoas das que inicialmente se descoñecía o seu paradoiro foron localizadas na rexión italiana de Basilicata e non formaban parte do grupo de excursionistas afectados polo suceso.
Os feitos ocorreron este luns, cando os excursionistas, que estaban a visitar as gargantas do río Raganello na rexión italiana de Calabria (sur), víronse sorprendidos polo desbordamento do torrente, causado polas fortes choivas.
As gargantas do río Raganello forman unha área natural protexida que se estende ao longo de 1.600 hectáreas e un canón de 13 quilómetros de lonxitude e que está situada no Parque nacional do Pollino.
Durante o verán, esta zona é visitada por numerosos turistas, "pero as crecidas do torrente danse só no inverno e nunca pasara nesta época do ano", explicou o responsable do equipo de rescate alpino de Calabria, Luca Franzese.
Con todo, as fortes choivas provocaron unha crecida e o nivel do torrente subiu dous metros en pouco tempo, e "era imposible que se desen conta do perigo porque nesa zona non estaba nin chovendo", engadiu Franzese.
