O avión ruso con 224 pasaxeiros abordo que se estrelou o sábado na península do Sinaí destruíuse no aire, informou este domingo o Comité de Aviación Interestatal (CAI) de Rusia.
"A destrución tivo lugar no aire e os fragmentos resultaron espallados por unha superficie de preto de 20 quilómetros cadrados", dixo Víctor Sorochenko, director executivo do CAI, á prensa rusa tras visitar o lugar do accidente.
Con todo, asegurou que "é aínda pronto para sacar conclusións" sobre as causas da traxedia aérea, a maior na historia de Rusia.
Segundo testemuñas oculares, o avión da aeroliña rusa Kogalimavia (Metrojet), un Airbus A-321, xa ardía en chamas antes de chocar contra a terra.
O antigo director da citada compañía, Serguéi Mordvintsev, asegurou este domingo que os aparellos desa clase da aeroliña nunca sufriran problemas técnicos.
"O A-321 é un aparello seguro. Durante o seu período de explotación os seus motores nunca experimentaron ningún problema", dixo á axencia Interfax.
Tanto as autoridades rusas como as exipcias descartaron un posible atentado terrorista como causa do accidente, como ocorrera no caso do Boeing malaisio que foi derrubado en 2014 por un mísil no leste de Ucraína.
Técnicos de ambos os dous países procederon á análise das caixas negras do avión que, segundo o ministro de Transporte ruso, sufriron "danos técnicos menores".
O avión ruso sinistrado en Exipto destruíuse no aire
Segundo testemuñas oculares, o Airbus A321 da aeroliña Metrojet xa ardía en chamas antes de chocar contra a terra
