Os ministros de Economía e Finanzas da zona do euro, o Eurogrupo, reuniranse o vindeiro venres en Bruxelas para abordar a nivel político o terceiro rescate a Grecia, despois de que Atenas e as institucións acredoras pechasen un acordo técnico o pasado martes.
"Eurogrupo extraordinario o venres 14 de agosto ás 15.00 (13.00 GMT) sobre Grecia", anunciou Michel Reijns, portavoz do presidente do Eurogrupo, Jeroen Dijsselbloem, nunha mensaxe na rede social Twitter.
Storify about the #Eurogroup and developments in program countries over the years https://t.co/M2ftz7oWmU
? Michel Reijns (\<sent\>MichelReijns) xullo 17, 2015A convocatoria do foro informal dos ministros dos países que comparten a moeda única europea chega despois de que os expertos da Comisión Europea, do Banco Central Europeo, do Fondo Monetario Internacional e do Mecanismo Europeo de Estabilidade pechasen o martes con Atenas un acordo tras intensas negociacións.
Grecia terá que aplicar axustes que suporán do 4 ao 5% do PIB do país, así como reformas nas pensións, a eliminación de beneficios aos agricultores e un estrito calendario de privatizacións, segundo o Memorando de Entendemento acordado, ao que tivo acceso Efe.
Este, que foi enviado este martes pola noite aos Gobernos para ser analizado, aínda ten que recibir o visto e prace dos socios de Grecia na eurozona para que o rescate poida ser asinado, contexto no que se convocou o Eurogrupo do venres.
Ademais, este mércores hai prevista ás 17.00 GMT unha teleconferencia do Comité Económico e Financeiro, que reúne aos 'número dous' dos ministros de Economía e Finanzas non só da eurozona, senón toda a Unión Europea, para que revisen o principio de acordo en común.
