O Goberno británico prevé probar o funcionamento de camións sen condutor, que supostamente axilizan o transporte e reducen o uso de combustible, nos próximos meses nunha autoestrada do norte de Inglaterra, informa este domingo The Sunday Times.
Segundo o xornal, o Executivo financiará unha proba piloto cun convoi de camións automatizados que avanzarán en conxunto pola M6 en Carlisle, no noroeste inglés, unha zona tranquila onde se pode pór en práctica sen riscos a nova tecnoloxía.
Espérase que o ministro de Economía británico, George Osborne, faga o anuncio cando presente os orzamentos xerais do Estado, o próximo 16 de marzo.
Na proba piloto, ata dez camións automatizados de gran capacidade seguirían a un primeiro vehículo conducido por unha persoa que controlaría electrónicamente a evolución da marcha de todo o grupo, explica o rotativo.
Menos o primeiro vehículo, o resto desprazarase sen condutor, controlado por un computador, aínda que haberá unha persoa na cabina que intervirá en caso de urxencia, engade o Times.
O Goberno xa investiu uns 19 millóns de libras (24,5 millóns de euros) noutros programas piloto en Inglaterra para probar coches sen condutor.
De acordo co xornal, a vantaxe deste tipo de vehículos é que poden viaxar con menos distancia de seguridade entre eles, o que reduce o uso de combustible e a contaminación.
Outros beneficios é que son flexibles en canto a rutas, o que contribúe a diminuír a conxestión e posiblemente tamén a reducir os accidentes de tráfico.
En declaracións a The Sunday Times, o presidente da asociación do motor AA, Edmund King, sinala non obstante que este tipo de camións "non teñen sentido" nas autoestradas británicas, moi cargadas de tráfico.
"As vantaxes desta tecnoloxía pódense notar nas autoestradas desertas de Australia ou Nevada, pero neste país temos autoestradas ateigadas nas que os condutores están constantemente intentando entrar e saír", declarou.
A introdución de camións automatizados só conseguiría "obstruir os sinais e o paso dos coches", advertiu.
O Goberno británico probará camións sen condutor na autoestrada
Na proba piloto, ata dez vehículos automatizados de gran capacidade seguirían a un primeiro vehículo conducido por unha persoa que controlaría electrónicamente a evolución da marcha de todo o grupo
