A cidade de Nova Iorque elixiu a unha enfermeira da comunidade afroamericana, unha das máis castigadas pola pandemia, e ao barrio de Queens, unha das áreas onde a covid-19 roubou máis vidas no país, para comezar a súa campaña de vacinación neste estado, que segue sendo o que máis defuncións rexistrou debido ao coronavirus.
A enfermeira de coidados intensivos Sandra Lindsey, que traballa no hospital Jewish Medical Center, recibiu a primeira dose da vacina no país norteamericano ás 9.23 hora local (15.23 en España).
"Espero que isto marque o principio do final dun tempo moi doloroso na nosa historia", dixo a sanitaria tras recibir a dose da vacina desenvolvida pola farmacéutica Pfizer e que foi aprobada pola Administración de Alimentos e Medicamentos (FDA, en inglés) de Estados Unidos o pasado venres.
A doutora que inoculou a dose tamén é afroamericana
Sentada nunha cadeira, xunto á doutora que lle inoculó a dose, tamén afroamericana, Lindsay quixo dar as grazas a todos os traballadores de primeira liña do mundo que como ela loitaron e seguen loitando contra a enfermidade, que en Nova Iorque causou máis de 35.000 mortes, sobre todo durante a primeira onda da pandemia na pasada primavera.
"Quero inculcar a confianza no público de que a vacina é segura", dixo a enfermeira, que insistiu en que ela cre na ciencia e en que o seu traballo "está guiado pola ciencia".
A administración da dose tivo lugar nunha conexión en directo co gobernador do estado Andrew Cuomo, que fixo as veces de presentador do evento.
"Creo que esta é a arma que acabará a guerra. é o comezo do último capítulo do libro", dixo Cuomo momentos antes de que Lindsay recibise a vacina.
Cuomo, que agradeceu o traballo dos profesionais da saúde e dos traballadores de primeira liña, aos que non dubidou en denominar "heroes", insistiu no seu desexo de distribuír a vacina o máis rápido posible.