Polo menos 18 persoas morreron e outras 40 resultaron feridas este mércores nun atentado con bomba e fusil perpetrado por un estudante nun instituto de Crimea. O autor da masacre nun colexio de Kerch era un alumno do centro educativo de 18 anos que se suicidou posteriormente, segundo informou o Comité de Instrución de Rusia.
"Foi o estudante do cuarto curso do intituto Vladislav Rosliakov, de 18 anos", dixo a portavoz do CIR, Svetlana Petrenko, quen explicou que a identidade do atacante, que chegou ao instituto cun fusil na man, foi establecida con axuda das cámaras de videovixilancia do establecemento. O ataque foi acompañado da detonación dun artefacto explosivo de fabricación caseira no comedor do establecemento educativo.
"O seu corpo con ferida de bala foi achado nunha das dependencias do colexio. A xulgar pola escena do crime, a investigación considera que o mozo disparou contra as persoas que se achaban no instituto e logo suicidouse", dixo Petrenko, citada pola axencia rusa Interfax.
Segundo os últimos datos, o ataque deixou polo menos 18 mortos e 40 feridos, a maioría adolescentes. Inicialmente o Comité de Instrución abriu un proceso penal por "terrorismo", que máis tarde, unha vez iniciadas as investigacións, modificou por asasinato "de dous ou máis persoas".
