Facebook rectifica e levanta a censura sobre a foto da nena en Vietnam

Facebook rectificou este venres e levantou a censura que impuxera á famosa foto da nena que foxe dun ataque con napalm, tomada en 1972 por Nick Ut na guerra de Vietnam, para tranquilizar unha polémica en Noruega que provocou as queixas de medios e autoridades do país nórdico.

A controversia comezou hai uns días, cando se soubo que Facebook pechara temporalmente a conta do escritor noruegués Tom Egeland por difundir na súa páxina a imaxe, na que aparece unha nena espida fuxindo do bombardeo con napalm realizado polas forzas estadounidenses.

Varios membros do Goberno noruegués, incluída a primeira ministra Erna Solberg, e o principal rotativo do país, Aftenposten, atacaron a Facebook, que finalmente deu marcha atrás e readmitiu a instantánea na súa rede.

"Unha imaxe dunha nena espida normalmente violaría as nosas Normas Comunitarias (políticas de contido apropiado en Facebook) e nalgúns países incluso podería ser cualificada de pornografía infantil", explicou a compañía que lidera Mark Zuckerberg nun comunicado que reproduciu o portal tecnolóxico Recode.

No entanto, Facebook recoñeceu "a historia e a importancia global" desta fotografía concreta.

"Debido ao seu status como unha icónica imaxe de importancia histórica, o valor de permitir que se comparta supera o valor de protexer á comunidade eliminándoa, así que decidimos readmitir a imaxe en Facebook onde somos conscientes que foi eliminada", engadiu a nota.

Previamente, diferentes persoas e varios medios en Noruega, alarmados pola supresión da conta do escritor Tom Egeland, compartiron tamén a fotografía pero foron, da mesma forma, cominados por Facebook a retirar a imaxe pola prohibición de difundir espidos nas súas páxinas.

"Facebook comete un erro por censurar fotos así. Falamos dunha imaxe que contribuíu á historia universal, a imaxe dunha nena aterrorizada que foxe da guerra", escribiu este venres na súa conta nesa rede social a primeira ministra norueguesa, Erna Solberg, que reproduciu ademais a mítica fotografía do reporteiro Nick Ut.

O comentario da primeira ministra norueguesa coa foto de Ut foi eliminado por Facebook horas despois, o que denunciou a propia Solberg nese mesmo medio, volvendo publicar esa e outras imaxes históricas.

"Mentres estaba sentada nun voo de Oslo a Trondheim (oeste de Noruega), Facebook borrou un comentario na miña páxina. O que fai eliminando fotos deste tipo, independentemente de que teña boas intencións, é reescribir a nosa historia común", afirmou.

O diario Aftenposten dedicou este venres toda a súa portada ao tema, e ademais de reproducir a foto, incluíu unha carta aberta do seu redactor xefe, Espen Egil Hansen, ao fundador da rede social, Mark Zuckerberg, na que sinalou que o diario non eliminará da súa páxina en Facebook a foto, "nin agora nin no futuro".

"Escoita, Mark, isto é serio. Primeiro facedes regras que non distinguen entre pornografía infantil e famosas fotos de guerra, logo aplicádelas sen deixar marxe ao bo xuízo e despois censurades tamén a crítica e o debate e castigades a quen se atreven a criticar", escribiu Hansen.