O actor George Clooney foi detido este venres nunha protesta ante a embaixada de Sudán en Washington na que se acusaba ao presidente sudanés, Omar al-Bashir, de provocar unha crise humanitaria por bloquear o acceso de comida e axuda na rexión das montañas de Nuba, na fronteira con Sudán do Sur.
Clooney foi esposado pola policía nunha manifestación que foi amplamente seguida polos medios de comunicación, que gravaron como o actor se achegou tranquilo cara aos axentes e cun medio sorriso recibiu os grilletes.
Os manifestantes denunciaron os bombardeos, a violencia e o uso de comida como "arma de guerra" por parte do Goberno de Sudán "contra homes, mulleres e nenos inocentes" no sur da rexión de Kordofan, unha área de fronteiras pouco definidas entre Sudán e o seu veciño Sudán do Sur.
O obxectivo desta protesta era chamar a atención do Goberno estadounidense e dos líderes mundiais para deter a violencia na rexión e previr unha catástrofe humanitaria.
Na manifestación, organizada pola National Asociation for the Advancement of Colored People (NAACP), tamén participaron o seu presidente, Ben Jealous, e o congresista demócrata Jim Moran.
O actor, un fervente activista a favor dos dereitos dos habitantes de Sudán do Sur, pediu esta semana ao presidente Barack Obama que convenza ao goberno de China para que se unha á presión internacional a fin de que o goberno sudanés permita que entre a axuda na fronteira sur do país para paliar a fame negra.
