O Goberno británico apoiou este mércores ao termo dunha reunión extraordinaria o borrador do Brexit acordado a nivel técnico polos negociadores do Reino Unido e a Unión Europea (UE), anunciou este mércores a primeira ministra, Theresa May.
Nunha declaración ante a súa residencia oficial de Downing Street e tras cinco horas de reunión, a premier conservadora comunicou o apoio político do seu gabinete de ministros a este pacto preliminar, logo dunhas complexas negociacións sobre a retirada británica da UE, que se concretará o 29 de marzo de 2019.
May afirmou que o acordo ao que chegou coa UE sobre o Brexit é "o mellor que podía ser negociado"
A xefa do Goberno admitiu que se tratou dun "longa, detallada e apaixonada" reunión do Goberno sobre a futura relación que terá o Reino Unido co bloque europeo.
O acordo alcanzouse, explicou, logo de miles de horas de reunións entre os negociadores ata superar o principal escollo, o da fronteira entre a República de Irlanda e a provincia británica de Irlanda do Norte, porque o obxectivo de todas as partes é que siga sendo invisible para non prexudicar a economía nin o proceso de paz nese territorio.
O Executivo concluíu de forma "colectiva" que o borrador debía ser aprobado e recoñeceu que esta decisión "non se tomou a treo", senón antepondo o interese nacional do Reino Unido, agregou May.
Este país, insistiu, recuperará "o control do noso diñeiro, as nosas leis e fronteiras, porá fin ao libre movemento, protexerá os empregos, a seguridade e a nosa unión" das catro rexións -Inglaterra, Escocia, Gales e Irlanda do Norte-.
A premier tamén informou de que este xoves fará unha declaración na Cámara dos Comúns para explicar o borrador do pacto, cuxo contido, duns 500 folios, aínda non foi divulgado.
Segundo os medios, o documento inclúe unha salvagarda para evitar o restablecemento dunha fronteira entre as dúas Irlandas despois de que o Reino Unido abandone o bloque dos 27.
Esa cláusula prevé que todo o Reino Unido permanecerá temporalmente nunha unión aduaneira coa UE, mentres que se engadirán provisións específicas para reforzar o aliñamento de Irlanda do Norte con esa área económica e coas regras do mercado único comunitario. Tras a retirada do Reino Unido da UE, empezará un período de transición ata finais de 2020.
Nunha carta dirixida ao presidente do Consello Europeo, Donald Tusk, Juncker sinalou que o acordo de retirada do Reino Unido "pode ser concluído" e pódese continuar co seguinte paso do proceso.
