A compañía tecnolóxica Google desautorizou hoxe a venda en Italia das lentes intelixentes Google Glass que varios establecementos distribúen neste país ao prezo de 1.999,99 euros e que identifican como orixinais.
"Desmentimos autorizar a venda do 'Google glass' en Italia. O 'Google Glass' están, neste momento, só en venda en Reino Unido e en Estados Unidos, a través do programa 'Explorer'", dixo a Efe a portavoz de Google en Italia, Simona Panseri.
A pesar da contundencia da multinacional estadounidense, algúns establecementos das cadeas Saturn e Media World en Italia xa din dispor deste dispositivo intelixente de realidade aumentada.
O prezo de venda é superior ao que Google anunciou que comercializaría o seu prototipo, a 1.500 dólares (1.080 euros) máis impostos, dentro do seu programa "explorador".
Este programa serve á compañía para pór o aparello en mans de usuarios, obter os seus comentarios, descubrir novas formas de utilizalo, e melloralo antes do seu lanzamento definitivo, que será previsiblemente antes de que finalice o ano.
