A Xustiza rusa declarou este luns culpable de asasinato á piloto ucraína Nadezhda Sávchenko, considerada presa política en Occidente e que podería ser condenada a 25 anos de cárcere pola morte de dous xornalistas rusos durante a guerra no leste de Ucraína.
"Sávchenko perpetrou o asasinato motivada polo odio e a hostilidade cara á poboación da rexión de Lugansk, e en xeral cara a todos os rusofalantes", asegurou Leonid Stepanenko, o presidente do tribunal de Donetsk, localidade rusa fronteiriza con Ucraína.
Segundo o fallo, a piloto proporcionou o 17 de xullo de 2014 ás forzas ucraínas as coordenadas dun posto de control das milicias prorrusas na rexión de Lugansk, onde se atopaban os dous reporteiros da radiotelevisión rusa que resultaron mortos por lume de morteiro.
As testemuñas citadas polo fiscal aseguran que Sávchenko era un dos líderes do batallón de voluntarios Aidar, considerado por Rusia unha forza de choque radical que cometeu numerosos excesos na fronte ucraína e non distinguía entre civís e militares. Ese "grupo criminal" dedicábase a "disparar con lume de artillería contra os civís, incluídos aqueles que non participaban nos enfrontamentos armados, co obxectivo de asasinarlles", reza o fallo.
Sávchenko converteuse desde o seu encarceramento hai 20 meses na máxima expresión da profunda inimizade que enfronta a ambos os países desde a anexión de Crimea por Rusia: ultranacionalista e asasina para os rusos, mártir e patriota para os ucraínos. Encerrada nunha gaiola escoltada por efectivos das forzas especiais encapuchados e armados con fusís automáticos, a tensa vista na que o xuíz comezou a ler a sentenza ameaza con provocar unha nova escalada de tensión entre Moscova e Kiev.
Debilitada pola folga de fame que mantén desde o 4 de marzo, Sávchenko escoitou sentada e calada o fallo, aínda que o seu avogado adiantou que non recorrerá, nin probará bocado ata que regrese a Ucraína e deixará de beber cando entre en vigor a pena dentro de dez días. "Viva ou morta", é o lema desta piloto, que foi elixida deputada pola Rada Suprema (Parlamento) de Ucraína e da Asemblea Parlamentaria do Consello de Europa e que, segundo o presidente de EE.UU., Barack Obama, debía ser liberada en virtude dos Acordos de Paz de Minsk.
O tribunal, que emitirá a condena este martes, ditaminou que Sávchenko foi detida cando cruzou ilegalmente a fronteira, aínda que ela denuncia que foi apresada polos separatistas e secuestrada polo Servizo Federal de Seguridade (FSB, antigo KGB) de Rusia.
