O presidente de México, Andrés Manuel López Obrador, afrontou nas últimas horas a peor crise do seu Goberno, tras unha refrega entre forzas federais e delincuentes na cidade de Culiacán que deixou polo menos 8 mortos, 16 feridos e 49 presos fuxidos. Tanto o presidente como o seu gabinete de seguridade admitiron erros na fallida operación para capturar a Ovidio Guzmán, fillo do narcotraficante Joaquín El Chapo Guzmán.
"Non pode valer máis a captura dun delincuente que as vidas das persoas. Eles —o gabinete de seguridade— tomaron esta decisión —liberalo— e eu apoieina", dixo o mandatario, a modo de xustificación, na súa conferencia matutina.
Logo de horas dun baleiro informativo por parte das autoridades que desatou todo tipo de rumores e versións, López Obrador asegurou este venres que se daría a coñecer a "verdade".
EXTRADICIÓN. O fillo do narcotraficante, sobre o que pesa unha orde de extradición solicitada desde setembro por EE UU, foi achado por un comando de 30 militares e membros da Garda Nacional nunha casa na cidade mexicana de Culiacán, no estado de Sinaloa —noroeste de México—, unha rexión considerada terra de narcotraficantes.
Para evitar a súa detención, o fillo do Chapo provocou horas de tiroteos e bloqueos na capital do estado, duns 800.000 habitantes, desatando o pánico entre a cidadanía.
Esta crise demostrou o poder do Cártel de Sinaloa e deixou ao descuberto as fisuras do Goberno de López Obrador en materia de seguridade. "(O comando) actuou de xeito precipitado con deficiente planeación e falta de previsión", chegou a recoñecer o xefe da Secretaría da Defensa Nacional, Luis Cresencio Sandoval.