Os 27 líderes da Unión Europea (UE) deron este sábado o seu respaldo de forma unánime ás directrices para negociar a saída do Reino Unido do club comunitario, informou o presidente do Consello Europeo, Donald Tusk.
"As directrices adoptáronse unanimemente. O mandato político firme e claro dos Vinte e sete da UE para as negociacións do Brexit está preparado", indicou Tusk a través da súa conta en Twitter, pouco logo de iniciarse o Consello Europeo en Bruxelas.
Pola súa banda, o presidente da Comisión Europea, Jean-Claude Juncker, destacou en Twitter a "unidade" existente entre os socios, e subliñou que as directrices foron adoptadas "en menos de 15 minutos".
A UE, "UNIDA". Os mandatarios deron así luz verde ao "conxunto de posicións e principios que a Unión seguirá ao longo de toda a negociación", segundo o texto adoptado, que engade que esas directrices poderán ser actualizadas durante a negociación, se fose necesario.
En particular, consagran o principio de que a UE negociará "unida" e que manterá esa unidade ao longo das negociacións, actuando "como unha co obxectivo de alcanzar un resultado que sexa xusto e equitativo para todos os Estados membros e en interese dos seus cidadáns".
Despois de que o Reino Unido abandone a UE, ningún acordo entre os Vinte e sete e ese país poderá aplicarse ao territorio de Xibraltar sen un acordo entre Madrid e Londres
FASES. Menciona así mesmo que a negociación levará a cabo "en fases", centrándose nunha primeira etapa en resolver "a desconexión do Reino Unido da Unión" e en facilitar toda a claridade e certidumbre legal, en particular aos cidadáns, sobre os efectos inmediatos da saída británica da UE.
Unha vez o Consello Europeo considere que hai "progreso suficiente" na primeira fase cara ao obxectivo de alcanzar un acordo satisfactorio sobre os pasos para "unha retirada ordenada", poderase pasar á segunda fase.
Nela deberíase alcanzar un "entendemento sobre o marco da futura relación" entre os Vinte e sete e Londres.
DEREITOS. Como primeira prioridade, os Vinte e sete fixaron este sábado os dereitos dos cidadáns, tanto europeos no Reino Unido como dos británicos en territorio comunitario.
Nese contexto, dixeron que as partes deben acordar "garantías recíprocas para salvagardar o status e os dereitos" derivados da lexislación europea.
Esas garantías "deben ser efectivas e completas e incluír o dereito a adquirir a residencia permanente logo dun período continuado de residencia legal de cinco anos", unha novidade que non figuraba no borrador das directrices.
Menciona tamén a necesidade de atopar solucións "imaxinativas" para evitar a creación dunha fronteira "dura" entre Irlanda e Irlanda do Norte.
As directrices deixan claro así mesmo que despois de que o Reino Unido abandone a UE, ningún acordo entre os Vinte e sete e ese país poderá aplicarse ao territorio de Xibraltar sen un acordo entre Madrid e Londres.
Por outra banda, inclúen unha referencia á necesidade de resolver "con rapidez" a futura localización das axencias europeas que se atopan en Reino Unido; é dicir, a Axencia Europea do Medicamento e a Autoridade Bancaria Europea, que deixarán Londres tras o Brexit.
