Atenta ás cuestións sociais ambientais e produtivas. O presidente francés, Emmanuel Macron, viu cumpridos eses requisitos na solvente e discreta Élisabeth Borne, extitular de Traballo e a segunda muller nomeada primeira ministra en Francia e cuxa permanencia no posto dependerá das lexislativas de xuño.
Substituta do conservador Jean Castex, no posto desde xullo de 2020, Borne, de 61 anos, foi nomeada este luns por Macron como segunda xefa de Goberno, logo da efémera experiencia de Edith Cresson (once meses entre 1991-92).
O recentemente reelixido presidente francés optou pola súa antiga ministra de Traballo, saída da órbita socialista, como un xeito de aplacar o malestar social en Francia, agravado nos últimos anos e reflectido nas presidenciais de abril, cando a ultradereita e a esquerda radical sumaron o 45% dos sufraxios.
Con Borne ao mando dun Goberno que deberá cambiar a varios dos seus ministros nos próximos días, Macron pretende asegurarse a á máis progresista da coalición presidencial Ensemble (Xuntos) nas eleccións lexislativas do 12 e 19 de xuño.
A meta é evitar que a nova coalición de esquerdas, bautizada como Nupes, poida obter unha maioría no Parlamento -improbable, segundo as enquisas- que imporía a Macron unha cohabitación cun primeiro ministro diferente a Borne, seguramente Jean-Luc Mélenchon, líder da Francia Insumisa (LFI).
NOVO MÉTODO CON DIÁLOGO. Nun afectuoso traspaso de poderes con Castex, Borne pronunciou un breve discurso no que aludiu á posta en práctica do "novo método de Goberno" con máis diálogo que pediu Macron e no que citou como prioridades o poder adquisitivo, a situación internacional ou o cambio climático e a transición enerxética.
Cresson, quen desempeñou o cargo durante o segundo mandato do socialista François Mitterrand (1981-1995).
"Dedico esta designación a todas as nenas para dicirlles que persigan sempre facer realidade os seus soños e que nada debe frear a loita polo lugar das mulleres na nosa sociedade", dixo Borne, no medio dos aplausos, nun repleto Palacio de Matignon, sede da presidencia do Consello de Ministros.
