Maduro aumenta un 40% o salario mínimo en vésperas dunha folga xeral

O presidente de Venezuela, Nicolás Maduro, anunciou este xoves que o salario mínimo, que perciben a maioría dos traballadores do país, subirá "de xeito integral un 40 por cento a partir do próximo 1 de novembro". O Goberno venezolano adoptou esta decision un día antes da celebración dunha folga xeral no país.

Este é o cuarto axuste á alza que o Executivo ordena no que vai de ano, tempo no que se profundou a crise económica na nación petroleira, cunha inflación que pechou 2015 no 180 por cento e agudizouse en 2016. Maduro explicou que, con este último aumento do 40%, no conxunto do ano incrementouse o salario mínimo nun 454 por cento.

A medida incidirá no diñeiro que perciben os traballadores mensualmente que pasará de 22.576 a 27.092 bolívares, así como no beneficio de alimentación que subirá de 42.480 a 63.720 bolívares.

Desta forma, millóns de empregados do sector público e privado en Venezuela terán dereito a un ingreso integral de 90.812 bolívares por mes, equivalentes a uns 138 dólares de acordo á taxa oficial de cambio máis alta, que se sitúa actualmente en preto de 650 bolívares por cada dólar estadounidense.

Maduro tamén indicou que este aumento se aplicará aos pensionados e xubilados, uns tres millóns de persoas, segundo o Goberno, que non perciben o beneficio de alimentación polo que a pensión -igual para todos os pensionistas- situarase en 27.092 bolívares (preto de 41 dólares). Ademais, todas as táboas salariais de empregados públicos do país que están fóra do soldo mínimo subirán un 20 por cento, agregou o xefe de Estado.

Estes anuncios do Executivo prodúcense un día antes dunha folga xeral de doce horas convocada pola alianza opositora Mesa da Unidade Democrática (MUD) para presionar por un cambio político no país.

A maior patronal de Venezuela, Fedecámaras, alertou que estes aumentos anunciados "de xeito inconsulta" polo Executivo pode levar a reducir os postos de traballo e ao peche de empresas que non poidan afrontalos.