A primeira dama de EEUU, Melania Trump, denunciou este luns o potencial "dano" das redes sociais, dentro da súa campaña contra o ciberacoso entre menores, á vez que o seu esposo, o presidente Donald Trump, continuaba cos seus ataques en Twitter contra algúns dos seus críticos.
"Na sociedade global de hoxe en día, as redes sociais son unha parte inevitable das vidas dos nosos fillos. Poden ser empregadas de xeitos moi positivos, pero tamén poden ser destrutivas e daniñas se se usan de xeito incorrecto", declarou a esposa do gobernante durante unha conferencia sobre o tema en Rockville (Maryland), nos arredores de Washington.
A primeira dama destacou que, aínda que "en moitos casos os nenos e nenas son máis conscientes dos beneficios e trampas das redes sociais que moitos adultos", é importante "ofrecerlles ferramentas e información para ter hábitos saudables en internet".
Esta iniciativa de Melania Trump, que impulsou desde a súa chegada á Casa Branca, xerou numerosas críticas no país ao contrastar co ton incendiario do seu esposo nas redes sociais, onde adoita arremeter, insultos incluídos, contra os seus críticos. Precisamente, mentres Melania participaba na conferencia sobre acoso dixital, Trump cargaba contra o exdirector da CIA John Brennan, a quen acusou de ser "o peor" xefe da axencia de intelixencia "da historia".
A pasada semana, o mandatario provocou a indignación xeneralizada tras cualificar tamén en Twitter de "cadela" a unha exasesora que publicou un libro sobre a súa etapa na Casa Branca. Ante estas comparacións, a directora de comunicación da primeira dama, Stephanie Grisham, saíu ao paso cun comunicado no que insistiu en que a súa participación na conferencia "subliñaba un tema que é importante para nenos e familias de todo o país". "É consciente das críticas, pero non lle deterán de facer o que considera correcto. O presidente está orgulloso do seu compromiso coa infancia e anímaa en todo o que fai", precisou Grisham.
