Polo menos 47 persoas morreron este xoves no naufraxio dun ferri no lago Vitoria, na parte noroccidental de Tanzania, pero non se descarta que a cifra de vítimas aumente xa que decenas de persoas continúan desaparecidas.
Segundo difundiu a televisión local ITV, os servizos de urxencia recuperaron xa 47 cadáveres mentres que a cifra de rescatados con vida ascende a 40.
Descoñécese cantas persoas viaxaban na embarcación, chamada Mv. Nyerere, xa que, aínda que a nave tiña unha capacidade oficial para unhas cen persoas —máis vinte e cinco toneladas de equipaxe e espazo para vehículos pequenos—, especúlase con que transportaba a máis do dobre de pasaxeiros.
O barco está operado pola Axencia de Servizos Electrónicos e Electromecánicos (EMESA) e afundiuse mentres cubría o percorrido entre a península de Ukerewe e a illa de Ukora, en pártea sur do lago Vitoria, o máis grande de África.
O turístico lago, rodeado por Uganda, Tanzania e Kenia, é escenario de múltiples accidentes e cada ano centos de pescadores morren en naufraxios provocados polas fortes tormentas, segundo medios locais.
