Polo menos vinte persoas resultaron feridas, unha delas está en estado grave, tras virse abaixo unha escaleira mecánica no metro de Roma, segundo informaron este martes os medios italianos.
O suceso ocorreu na estación de metro de República, preto da estación de Roma Termini.
A maioría dos feridos son de nacionalidade rusa e atoparíanse na capital italiana para asistir ao partido deste martes da fase de grupos entre o Roma e o Cska de Moscova, segundo as mesmas informacións.
Á zona trasladáronse equipos de urxencia, Policía e membros do corpo de Bombeiros, confirmaron os Bombeiros no seu perfil da rede social Twitter.
A maioría dos afectados presenta feridas as pernas e a persoa que está grave foi trasladada a un hospital con danos importantes nun pé. Hai, ademais, polo menos sete persoas con fracturas e traumatismos que tamén foron ingresadas en centros hospitalarios da capital italiana.
A alcaldesa de Roma, Virginia Raggi, explicou nun vídeo publicado nas redes sociais que, conforme ás primeiras reconstrucións dos feitos e tras escoitar os testemuños de afectados, a escaleira afundiuse despois de que un grupo de xente bailase e saltase.
"Trataremos de comprender que ocorreu e estamos a disposición dos feridos e das familias", subliñou.
A Fiscalía de Roma abriu unha investigación para esclarecer os feitos. Tamén a entidade que xestiona o transporte de Roma, Atac, levará a cabo a súa propia instrución.
