Helicópteros de rescate localizaron este xoves a avioneta en que viaxaba o ministro paraguaio de Agricultura e Gandería, Luis Gneiting, e outras tres persoas, nas proximidades do aeroporto de Ayolas (sur de Paraguai), onde saíra onte á noite con destino a Asunción e perdeu o contacto.
Ningún dos ocupantes conseguiu sobrevivir ao sinistro. A aeronave, que presenta graves danos, atopábase nunha zona pantanosa nas proximidades do aeroporto de Ayolas, a uns 300 quilómetros de Asunción, segundo fontes da Dirección Nacional de Aeronáutica Civil (Dinac).
Na avioneta viaxaban, ademais de Gneiting, o viceministro de Gandería, Vicente Ramírez; o piloto Gerardo López, e o funcionario do ministerio Luis Charotti.
A avioneta, un modelo Baron BE58, partiu desde Ayolas a tarde do mércores e xa non se volveu a ter comunicación.
Durante toda a noite realizáronse batidas terrestres ata que esta mañá deuse co aparello desde o aire.
Gneiting, un veterano político do gobernante Partido Colorado, foi designado o pasado maio ministro de Agricultura e Gandería polo presidente paraguaio, Horacio Cartes.
