Catro nenos morreron este xoves despois de que un tren atropelase a bicicleta con remolque na que viaxaban nun paso a nivel do municipio de Oss, no sur de Holanda, un suceso que tamén causou feridas graves a outro menor e a un adulto. Segundo a Policía, os nenos falecidos dirixíanse a unha escola primaria onde estudan e ían sentados no carro de carga que a bicicleta levaba enganchado na parte dianteira.
Os feridos graves atópanse ingresados no hospital en estado crítico.
O accidente ocorreu á primeira hora da mañá nun cruzamento de ferrocarril, preto da estación de Oss West, e varios nenos foron testemuñas do ocorrido e están a ser atendidos por psicólogos nuna unidade móbil sanitaria do municipio. A Xunta de Seguridade holandesa enviou ao seu persoal ao lugar do accidente para levar a cabo unha investigación sobre o que puido fallar, dirimir responsabilidades e determinar se se tratou dun fallo no sistema do paso a nivel ou do condutor da bicicleta, que non freou a pesar do aviso de que se aproximaba un tren.
Segundo a televisión holandesa NOS, tamén trabállase coa hipótese dun fallo na bicicleta, xa que é eléctrica.
