O magnate Elon Musk, propietario de Twitter, debería renunciar á dirección da rede social segundo os resultados da consulta que el mesmo convocou e na que preguntaba aos usuarios se era el quen debería ou non seguir dirixindo a empresa.
Á pregunta "¿Debo seguir á cabeza de Twitter?" un 57,5% de usuarios da rede social votou "non", mentres que un 42,5 por cento optou polo "si". En total, participaron 17,5 millóns de usuarios.
Should I step down as head of Twitter? I will abide by the results of this poll.
— Elon Musk (@elonmusk) December 18, 2022
O propio Musk prometeu, cando convocou a consulta, que acataría os resultados. O magnate tamén publicou outra mensaxe no que anunciou que habería unha votación para "cambios maiores de política" na rede.
O anuncio da consulta sobre a continuidade de Musk xerou unha avalancha de comentarios, ante os que el mesmo quixo publicar unha aclaración: "Non se trata de atopar un director executivo (CEO), trátase de atopar un director executivo que poida manter Twitter con vida".
Ante o comentario dun voluntario para asumir a dirección da rede social, o millonario lanzou unha resposta case dramática: "Tenche que gustar moito a dor. (E hai) unha pega: tes que investir os aforros da túa vida en Twitter, pois está en vía rápida cara á bancarrota desde maio. ¿Segues querendo o traballo?", ironizou.
O desembarco de Musk en Twitter, que comprou por 44.000 millóns de dólares, estivo acompañado de numerosas polémicas. As máis graves son as referentes á política de contidos e á posibilidade de que a propia rede social admita críticas contra o seu propietario.