Levan ao Parlamento grego o segundo paquete de reformas acordadas cos socios europeos

O Goberno grego introduciu no Parlamento o proxecto de lei sobre a reforma do código civil e a directiva europa de saneamento de bancos, o segundo paquete de reformas acordadas cos socios que será sometido a votación este mércores.

O texto recolle cambios no código civil e a incorporación á lexislación grega da directiva europea BRRD, que se refire ao saneamento dos bancos e garante os depósitos bancarios ata 100.000 euros en caso de quita.

Segundo o procedemento de urxencia polo que se tramitará este proxecto de lei, está previsto que este mércores se analice en comisións que se estenderán toda a xornada e que o pleno se inicie pola noite para debater e votar as medidas.

A reforma do código civil provocou malestar entre xuíces e avogados, que criticaron a falta de información sobre os cambios que prevé.

Fontes gobernamentais sinalaron que o proxecto non inclúe a eliminación das exoneracións fiscais dos agricultores nin a restrición das xubilacións anticipadas.

Nun principio falouse de que podían estar entre as medidas que se votarán este mércores, aínda que non figuran na lista de requisitos previos que se estipulou que debían estar lexislados despois do 22 de xullo, de acordo co pacto alcanzado entre o Goberno e a eurozona hai oito días.

Prevese que estas dúas cuestións poidan ser votadas xunto a outras medidas nunha sesión posterior que podería celebrarse a principios de agosto.

O incremento do 13 % ao 26 % da tasación aos ingresos dos agricultores provocara a reacción de varios deputados da maioría gobernamental e dos partidos da oposición, que teñen entre os agricultores un importante caladoiro de votos.

Na sesión deste mércores o Goberno de Alexis Tsipras afronta unha nova proba de unidade, despois de que 39 deputados de Syriza non apoiasen o acordo na votación do pasado mércores, o que conduciu a unha remodelación do Executivo para substituír os membros díscolos.

A aprobación destas medidas é unha condición para que Grecia e os acredores poidan iniciar as negociacións sobre o terceiro programa de rescate.