As barreiras de plexiglás que separaron este mércores ao vicepresidente de Estados Unidos, Mike Pence, do seu rival e candidata demócrata, Kamala Harris, foron unha metáfora das súas diferenzas políticas, que estalaron ao abordar a pandemia de covid-19 nun claro reflexo da polarización que vive o país a menos dun mes das presidenciais.
Pence e Harris protagonizaron un debate clásico, con acusacións mutuas e evitando responder preguntas incómodas, pero afastado do caos da cara a cara da semana pasada entre os seus xefes de filas, o presidente Donald Trump e o demócrata Joe Biden, que deixou un mal sabor de boca xeneralizado.
A pesar dos bos modos, a demócrata e o republicano chocaron na maioría de asuntos, pero sobre todo na pandemia, que deixou xa máis de 210.000 mortos en Estados Unidos e unha devastación económica sen precedentes.
A VACINA DA DISCORDIA. Trump está a utilizar a pronta aprobación dunha futura vacina como arma electoral e Harris tivo esta noite a oportunidade de abordala ao ser preguntada se lla poría, dado que segundo enquisas o 50 % de estadounidenses non ten intención de facelo.
"Se o doutor (Anthony) Fauci (o principal epidemiólogo da Casa Branca), se os médicos nos din que debemos pórnola, serei a primeira na fila para porma, absolutamente. Se Donald Trump nos di que debemos pórnola, non o farei", dixo a senadora por California.
Esta resposta de Harris enfureceu a Pence, que durante meses liderou o grupo de traballo da Casa Branca contra o covid-19, ao afirmar que só lles pido (aos demócratas) que deixen de politiquear coa vida da xente. A realidade é que teremos unha vacina, cremos, antes de fin de ano e terá a capacidade de salvar innumerables vidas de estadounidenses".
SÁBADO DE COVID NA ROSALEDA DA CASA BRANCA. A moderadora, Susan Page, xornalista do diario USA Today, descolocou a Pence ao cuestionarlle sobre o acto de hai once días na Rosaleda da Casa Branca, que parece ser o foco dos contaxios na mansión presidencial: "Como espera que os cidadáns sigan as recomendacións se vostedes na Casa Branca non o fan?".
"Confiamos -respondeu o vicepresidente- en que os estadounidenses tomarán as mellores decisións para a súa saúde. Respectamos a liberdade".
Harris recolleu entón a luva que lle lanzou Pence e acusou ao Goberno de Trump de esconder información aos estadounidenses desde o momento en xaneiro no que tiveron constancia do perigo da pandemia.
"Respectas ao pobo estadounidense cando lle dis a verdade. Respectas ao pobo estadounidense cando tes a coraxe, dun líder, de falar desas cousas que quizais non queres que a xente escoite, pero que necesitan escoitar para poder protexerse", afirmou.
E sentenciou: "O pobo estadounidense foi testemuña do maior fracaso de calquera Administración presidencial na historia do noso país".
A MACHOEXPLICACIÓN DE PENCE. Pasada a polémica páxina da pandemia, ambos recorreron ao libreto para responder ou esquivar as preguntas e o que máis emocionou á audiencia, polo menos en Twitter, foi a mosca que se pousou sobre a cabeleira canosa de Pence durante varios segundos.
Con todo, Harris, unha afroamericana de orixe india que foi fiscal xeneral de California, cortou en seco ao republicano cando este tratou de darlle unha lección sobre racismo e xustiza.
"Non vou sentarme aquí a ser sermoneada polo vicepresidente", espetou Harris despois de que Pence afirmase que os demócratas "insultan" aos policías estadounidenses cando afirman que existe racismo sistémico no país.
Ademais, no que pareceu ser unha estratexia preparada por parte de Harris, a demócrata aproveitou a primeira interrupción de Pence para reclamar o seu dereito á palabra: "Estou a falar". "Se non lle importa -engadiu-, déixeme terminar. Así poderemos ter unha conversación".
O ÚLTIMO DEBATE ANTES DAS ELECCIÓNS? O deste mércores puido ser o último debate da campaña, xa que a dúas cara a cara que quedan entre Trump e Biden programados para o 15 e o 22 de outubro están como mínimo en dúbida polo covid-19 do presidente.
Trump anticipou xa a súa intención de participar no debate da semana que vén en Miami, pero Biden dixo que só o fará no caso de que o mandatario supere a enfermidade, no que xa promete ser a pugna electoral dos próximos días en Estados Unidos.
