O Programa Mundial de Alimentos (PMA) foi galardoado este ano co premio Nobel da Paz pola súa loita para "combater a fame" a nivel mundial, no marco da cal brindou axuda a 100 millóns de persoas en 88 países durante 2019. "A necesidade de solidariedade internacional e cooperación multilateral é máis evidente que nunca", segundo o Comité Noruegués do Nobel, que personificou o seu recoñecemento na figura do PMA, entre outras razóns pola súa labor "para impedir o uso da fame como arma de guerras e conflitos".
O xurado recordou que a erradicación da fame é un dos Obxectivos de Desenvolvemento Sostible (ODS) e que aínda en 2019 había 135 millóns de persoas en situación de inseguridade alimentaria aguda, "o número máis alto en moitos anos", en gran medida polos efectos colaterais de situacións de violencia. De feito, consideran que "a relación entre fame e conflitos é un círculo vicioso".
Ademais, "a pandemia de coronavirus contribuíu a un drástico repunte no número de vítimas da fame", segundo o Comité, que recoñeceu a "impresionante capacidade" do PMA para seguir levando a cabo o seu traballo en plena urxencia sanitaria. Neste sentido, parafraseou á propia organización para apuntar que "ata que haxa unha vacina médica, a comida é a mellor vacúa fronte ao caos".
O xurado quixo pór en valor a necesidade de que organizacións como o PMA reciban os fondos que necesitan. "O mundo corre o risco de sufrir unha crise da fame de proporcións inconcibibles se o PMA e outras organizacións de asistencia alimentaria non reciben o apoio económico que necesitan", advertiu, alertando de situacións como as de Iemen, República Democrática do Congo, Nixeria, Sudán do Sur e Burkina Faso.
"Onde hai conflito, hai fame"
O Programa Mundial de Alimentos agradeceu a través de Twitter o galardón, no que a organización ve "un poderoso recordatorio para o mundo de que a paz e a fame cero van da man", algo que tamén quixo salientar o director executivo da axencia, David Beasley, nun comunicado. O responsable cualificou de "abafador" e "emocionante" o recoñecemento, que dedicou a todos os traballadores que se deixan a pel todos os días para levar comida e asistencia a case 100 millóns de nenos, mulleres e homes famentos de todo o mundo". Persoas, engadiu, "cuxas vidas a miúdo se viñeron completamente abaixo pola inestabilidade, a inseguridade e o conflito".
Así, sinalou que "todas e cada unha das 690 millóns de persoas famentas no mundo teñen o dereito de vivir en paz e sen fame", incidindo en que, co Nobel, o Comité Noruegués puxo o "foco global" sobre estas persoas e sobre as "consecuencias devastadoras" das guerras. "Onde hai conflito, hai fame. E onde hai fame, a miúdo hai conflito. Debe ser un recordatorio de que seguridade alimentaria, paz e estabilidade van xuntos. Sen paz, non podemos lograr o noso obxectivo global da fame cero e, mentres haxa fame, nunca haberá un mundo en paz", agregou.
Beasley considerou que o Nobel non recoñece só o labor do PMA, senón tamén a doutros actores que axudan igualmente ás poboacións vulnerables. "Posiblemente non poderiamos axudar a ninguén sen eles", dixo, en alusión a organizacións, gobernos e entidades privadas.
CERIMONIA REDUCIDA. A axencia da ONU sucede no palmarés ao primeiro ministro de Etiopía, Abyi Ahmed, que recibiu o Nobel da Paz en 2019. Para a edición deste ano presentáronse as candidaturas de 211 persoas e 107 organizacións, a cuarta cifra máis alta de toda a historia. A cerimonia de entrega terá lugar o 10 de decembro, aínda que o formato será distinto ao doutros anos por razóns sanitarias. Os organizadores optaron por mover a cerimonia de entrega desde o Concello de Oslo, que a acolle desde 1990, á Aula da Universidade, un recinto menor pero que xa foi escenario do evento entre os anos 1947 e 1989.
