O xigante gasístico ruso Gazprom confirmou este martes que cortará este mércores, o gas ás compañías Ørsted, principal grupo enerxético de Dinamarca, e a Shell Energy Europe, que fornece gas a Alemaña, por negarse estas a pagar polo combustible en rublos.
"A empresa danesa Ørsted informou a Gazprom Export de que non ten a intención de realizar pagos polo gas fornecido en rublos de acordo co decreto presidencial do 31 de marzo", sinalou a compañía rusa na súa conta de Telegram.
Tras non recibir este martes no prazo estipulado no contrato o pago por parte de Ørsted polas entregas de gas en abril, Gazprom notificou á empresa danesa de " suspensión da subministración a partir do 1 de xuño".
Gazprom xa cortou o gas a Países Baixos, Polonia, Bulgaria e Finlandia polo mesmo motivo.
O esquema ideado polo presidente ruso, Vladímir Putin, para esquivar as sancións occidentais obriga aos clientes estranxeiros de países "inamistosos" -entre eles todos os da Unión Europea- a abrir dúas contas especiais en Gazprombank.
Nunha deben ingresar o diñeiro polo gas ruso recibido en euros ou dólares, que logo é convertido en rublos na Bolsa de Moscova e transferido á segunda conta en divísaa nacional de Rusia.
Ørsted explicou a véspera que consideraría o corte de subministración como
A firma danesa resaltou que Rusia non poderá cortar a subministración de forma directa, xa que non hai un gasoduto de Rusia a Dinamarca, senón que esta obteno a través de Alemaña.
De feito, Gazprom informou este martes de que Shell Energy Europe notificoulle que non pretende efectuar pagos en rublos en virtude do contrato de subministración de gas a Alemaña.
A subministración máxima anual baixo este contrato é de 1.200 millóns de metros cúbicos.
"Ao final do día hábil do 31 de maio, Gazprom Export non recibiu ningún pago polas entregas de gas de Shell Energy Europe en abril", polo que se informou a esa empresa da "suspensión das subministracións a partir do 1 de xuño".
