Varias persoas resultaron feridas despois de que un automóbil chocase contra as barreiras de seguridade colocadas ante o Parlamento británico, informou este martes Scotland Yard. O condutor do vehículo, cuxa identidade polo momento se descoñece, foi detido, agregou a fonte.
As rúas próximas á praza do Parlamento de Westminster foron pechadas ao tráfico, mentres que varios vehículos policiais e ambulancias acudiron ao lugar, segundo os medios británicos.
"Ás 7.37 (6.37 GMT), un coche chocou contra as barreiras ante as Casas do Parlamento. O condutor, un home, foi detido no lugar por axentes de Policía. Un número de peóns resultaron feridos. Os axentes están no lugar", sinalou un comunicado divulgado este martes pola mañá por Scotland Yard. Segundo os medios, hai uns dez vehículos policiais no lugar e polo menos tres ambulancias.
O edificio parlamentario está rodeado por unhas barreiras de aceiro e formigón despois do atentado perpetrado en marzo do ano pasado por un home que conducía un vehículo.
Nese ataque, Khalid Masood arrolou a varias persoas na ponte de Westminster, próximo ao Parlamento, onde matou a catro persoas, para despois baixarse e tratar de entrar no edifico, onde matou cun coitelo ao axente de Policía, Keith Palmer.
