O asasinato nunha prisión de alta seguridade de Virginia Occidental (EE.UU.) do gángster James 'Whitey' Bulger a mans doutro reo pon fin a unha vida digna da pluma dos mellores guionistas de cine negro; un cóctel de deslealdade, corrupción policial e crueldade.
O octoxenario capo faleceu xusto un día logo de chegar á penitenciaría de alta seguridade de Hazelton (Virginia Occidental) tras ser trasladado desde outro cárcere de Oklahoma City (Oklahoma).
'Whitey' Bulger, de 89 anos, a quen inmortalizou o actor Jack Nicholson na película de 2007 'The Departed' de Martin Scorsese e Johnny Depp en 'Black Mass' (2015) de Scott Cooper, foi o xefe da mafia irlandesa en Boston nos anos 70 e 80.
Nesas décadas, a banda de Bulger, centrada no sur de Boston, e os seus rivais da mafia italiana, con conexións en Nova York, protagonizaron unha sanguenta batalla polo control da cidade.
Bulger foi condenado en 2013 a dúas sentenzas de cadea perpetua por 11 asasinatos ocorridos durante os seus anos á fronte da temida "Winter Hill Gang", que dominaba gran parte do negocio de tráfico de drogas, extorsión e as apostas ilegais da urbe.
Ademais do seu legado como gran capo do crime en Boston por case 20 anos, a súa historia inclúe tamén a novelesca figura do policía corrupto: o axente da FBI John Connolly, criado no mesmo barrio que Bulger, e que avisaba aos gángsteres sobre os operativos policiais.
E, nun xiro argumental aínda máis ambicioso, a conexión política. O irmán de 'Whitey' Bulger, William, era un coñecido político demócrata local que chegou a ser presidente do Senado de Massachusetts e que estivo á fronte da prestixiosa Universidade estatal ata que os vínculos co seu irmán, con quen supostamente conversou mentres estaba fuxido, obrigaron a pór fin á súa carreira pública en 2003.
O que non aparece na película de Scorsese, aínda que dá para unha máis que interesante secuela, son as tranquilas andanzas de Bulger, tras a súa fuxida de Boston en 1994.
Durante 16 anos permaneceu escondido nun sinxelo apartamento da plácida Santa Mónica, unha acomodada cidade do condado de Los Ángeles a beiras do Pacífico, xunto á súa compañeira sentimental Catherine Greig, mentres a FBI situábao na lista dos fugitivos máis buscados xunto a Osama bin Laden.
Exasperados pola incapacidade de localizar ao gángster, os axentes federais decidiron concentrarse en determinar o paradoiro de Greig, coñecida pola súa paixón pola cirurxía estética.
Foi a ela a quen finalmente descubriron en 2011 grazas ao rastro deixado polas súas operacións de embelecemento, acompañada por un home de avanzada idade: era Bulger, lixeiramente envellecido, quen obviamente vivía baixo outro nome.
Greig, que cumpre condena por cargos menores, prevese que recupere a liberdade en 2020.
