MOAÑA. Efectivos da Policía Local de Moaña tiveron que intervir onte ante o aviso duns veciños sobre un desprendemento de terra e pedra no Peirao do Con.
Os axentes, que teñen limitadas as responsabilidades nas zonas portuarias, acordoaron o desprendemento e deron aviso ao 112 e a Portos de Galicia, desde onde se deben articular as medidas para solucionar o problema.
á súa vez, como a terra e pedras afectaba os amarres dalgunhas embarcacións pesqueiras, os policías alertaron a membros da Confraría de Pescadores para que avisasen aos propietarios dun par de embarcacións, de modo que puidesen retiralas e actuar en consecuencia.
O tramo afectado é o que ocupan os barcos mexilloeiros, segundo explicaron fontes policiais.
Os mesmos axentes precisaron que non se trata dun gran desprendemento, e que, en principio, non parece que haxa risco de novos corrementos de terra na zona. O suceso produciuse ás 18.30 horas, aproximadamente e o pequeno alude de terra non afectou a ningún viario nin ao tráfico.
