A cidade de Pontevedra "abriu" este venres a billa ao concello de Barro. Tal e como se acordou, o Goberno local da capital deu luz verde á cesión de parte da súa subministración á vila veciña, que desde hai uns días aplicou restricións no abastecemento a un terzo da poboación (fundamentalmente aos veciños do núcleo urbano de San Antoniño), a consecuencia da seca.
Pasaban uns minutos das 10.00 horas cando catro camións cisterna chegaban a Pontevedra para trasladar uns 100.000 litros de auga. A operación repetirase ao longo dos próximos días, aínda que o Concello barrense confía en que a curto prazo se produza un cambio nas condicións meteorolóxicas que sirva para dar un respiro á situación dos mananciais dos que se nutre o depósito do Outeiro, que desde este venres conta co "reforzo" da axuda prestada pola cidade do Lérez.
Estes traballos foron supervisados polo alcalde, Xosé Manuel Abraldes, e o tenente de alcalde, José Sanmartín. Ambos insisten en que esta medida é de carácter preventivo e que ten como obxectivo evitar males maiores. No caso dos cortes na rede de abastecemento, que se producen entre a unha e as seis da madrugada (en principio eran ata as 7.00 horas), o que se busca é "evitar un gasto excesivo". Antes de que o Concello de Barro reclamase axuda a Pontevedra, o nivel de auga no depósito do Outeiro apenas superaba o medio metro. Con todo, a situación mellorou ostensiblemente nos últimos días. "Pouco a pouco vaise recuperando", aseguraba o pasado xoves o propio Sanmartín, que sinalou que "ou problema que tingamos é que a auga que ía entrando do manancial era practicamente a mesma cantidade que a que se consumía, co cal non producíase ningunha recuperación".
O Goberno municipal de Barro instalará novos contadores para controlar o uso da rede municipal en diferentes zonas
CONTADORES. Ademais das medidas xa aplicadas, a Administración municipal de Barro ten previsto colocar novos contadores, especialmente en zonas nas que se achan vivendas que dispoñen de abastecemento propio, a fin de que non se conecten á rede que presta servizo aos inmobles que carecen de subministración. O Concello sospeita que algúns veciños se conectan á rede principal para realizar tarefas de regadío ou para encher piscinas.
Ademais de San Antoniño, hai unhas 18 vivendas, situadas no lugar do Outeiro, que tamén ven afectadas polos cortes nocturnos. Precisamente, foi nesta zona onde comezaron as restricións. En total, o Concello calcula que dúas terceiras partes da poboación dispoñen de subministración propia.
A ausencia de choivas tamén levou a outros municipios da provincia a tomar medidas de carácter preventivo. Mentres que en Lalín organizouse un gabinete de crise para atallar posibles problemas derivados da falta de auga, en Poio xa se está desviando parte da subministración aos depósitos dalgúns núcleos do rural. En Marín sucede algo similar en Cadrelo.
O CASO DE SANXENXO. Mentres outras localidades veciñas buscan fórmulas para evitar que a ausencia de precipitacións e as altas temperaturas dos últimos días pasen factura ao abastecemento, no concello turístico por excelencia da provincia son alleos a estes problemas.
En Sanxenxo, a pesar do aumento da poboación en agosto, non se prevé realizar ningún tipo de medida preventiva
Así o asegura o Goberno local, que afirma que, a pesar do exponencial aumento que experimenta a poboación da vila durante o mes de agosto, non será necesario tomar ningunha medida de carácter preventivo, nin sequera nas zonas do interior. A este respecto, o tripartito recorda que actualmente Sanxenxo dispón de media ducia de depósitos, situados nas parroquias de Adina, Vilalonga, Dorrón e Padriñán. En total, todos eles dispoñen dunha capacidade que ascende a máis de 9.400 metros cúbicos. Ademais, existe un sétimo recipiente, situado en Nantes, que se podería pór a punto no caso de que fose necesario. A vila abastécese tamén a través dos ríos Lérez e Umia.
Deste xeito, o Concello non se expón ter que realizar cortes da subministración, polo que non se repetirán escenas como a vivida durante o verán de 2011, cando o Goberno local viuse obrigado a "pechar a billa" das duchas das praias, o que provocou unha forte controversia e numerosas queixas por parte dos bañistas.
