O exmandatario italiano Silvio Berlusconi reiterou hoxe que o seu partido, Forza Italia, non apoiará ao posible novo Executivo de Matteo Renzi, tras entrevistarse co Xefe de Estado italiano, Giorgio Napolitano, quen celebra consultas coas forzas políticas para a formación de novo goberno.
Berlusconi expresou "preocupación e estupor" pola crise de Goberno que se abriu despois de que o primeiro ministro Enrico Letta presentase onte a súa dimisión, tras verse abandonado pola súa formación, o Partido Demócrata (PD), que esixiu un novo Executivo para saír do inmovilismo.
"Seguiremos facendo unha oposición responsable", resolveu Berlusconi.
No entanto, as tres veces presidente do Goberno asegurou que a súa formación si que apoiará a aprobación da nova lei electoral, forxada en colaboración co líder do PD, Matteo Renzi.
A reunión entre Napolitano e Berlusconi ía máis aló da mera rolda de consultas e espertara toda a atención mediática da xornada.
A presenza de Berlusconi nas consultas provocara fortes críticas nalgúns sectores xa que, aínda que "Il Cavaliere" é o lexítimo líder dun partido, foi expulsado do Parlamento pola súa condena en firme por fraude fiscal e segundo as leis non pode ocupar cargos institucionais ou presentarse ás eleccións nos próximos seis anos.
Algunhas decenas de cidadáns concentráronse ante o Quirinale, sede da presidencia da República, como protesta porque Napolitano reciba a un condenado en espera só de que se aplique a sentenza: un ano de traballos sociais e dous anos de inhabilitación de calquera cargo público.
Napolitano e Berlusconi non se vían desde o pasado abril, tamén cando acudiu ao Quirinale para a rolda de consultas tras as que se encargou a Letta formar un Goberno.
Desde entón, Berlusconi criticara duramente ao Xefe de Estado por non intervir para concederlle a absolución da súa condena.
"Il Cavaliere", título que tamén perderá tras a aplicación da condena, marchouse hoxe do Quirinale sen responder as preguntas dos xornalistas.
