Os veciños de Campañó gozaron este domingo das festas dedicadas á Virxe das Dores con plena complicidade do astro rei, que luciu durante toda a xornada sen paliativos.
Tras a xornada festiva do sábado, os residentes e visitantes a esta parroquia asistiron a un programa cargado de actos que comezou coa tradicional tirada de bombas de palenque. Ao mediodía foi quenda dos actos litúrxicos, nos que participou a Coral Airiños de Campañó. O colofón foi a procesión que dita o costume, na que os fregueses acompañaron ás imaxes da Virxe das Dores, San Pedro (o patrón da parroquia), Virxe do Rosario e San Ramón (que se veneran no templo parroquial).
A verbena correu a cargo do conxunto Xacobeo, que puxo a nota de despedida ata a próxima edición. Agora a incógnita é saber que ocorrerá o ano que vén, pois a actual comisión de festas xa anunciou a súa intención de retirarse destas tarefas. Polo momento, as de 2016 foron celebradas como merecía a ocasión.
Campañó vístese de festa en honra á Virxe das Dores
Agora a incógnita é saber que ocorrerá o ano que vén, pois a actual comisión de festas xa anunciou a súa intención de retirarse destas tarefas
