A Garda Civil tiña localizado a Sergio Carabelos, tras fuxir da prisión da Lama, pero, ao parecer, non o detivo para reunir probas que o puidesen implicar noutro turbio asunto, pero cando quixo proceder á súa detención abandonara o seu agocho, segundo sinalou onte axénciaa EFE, baseándose en fontes da investigación.
No entanto, a Benemérita de Pontevedra negou estes feitos. Sergio Carabelos caeu ao mar cando navegaba nunha embarcación de recreo xunto a outras dúas persoas (Pedro Prieto Díaz, o fillo dos propietarios do edificio Boavista de Baltar, e o cambadés Jesús Fernández Touriño) que deron positivo na proba de alcoholemia o pasado sábado.
Segundo relatou EFE, a Policía Xudicial, tras decatarse de Carabelos non regresara ao cárcere tras un permiso en xuño de 2007 (cumpría condena pola tortura e secuestro do arousán José Radío), localizouno nunha casa que rexentaba en Meis José Lafuente (outro dos condenados polo rapto de Radío), pero os axentes, ao parecer, trataban de pechar un novo caso no que supostamente estaba implicado o prófugo. Cando o foron a arrestar, Carabelos fuxira de novo.
Cando ocorreu o suceso do barco o pasado sábado, Carabelos residía en Portonovo, nun apartamento que tiña alugado unha amiga, ao parecer, no edificio Boavista. Quen non puido escapar do cerco policial foi un compañeiro de fuga, José Luís Lúa Pereira, que foi capturado en Santiago, tal e como destacou Efe.
Fontes da Benemérita explicaron que Lúa, un mozo vigués de 36 anos, foi detido en tres ocasións por atracos e que se trata dunha persoa violenta. Ademais, a axencia de noticias resaltou que a Garda Civil de Pontevedra, tras interrogar aos seus acompañantes, considera que Carabelos caeu ao mar e que non se urdió un plan para dalo por morto. A Policía Xudicial barallaba esta hipótese ao non atopar o corpo do home desaparecido e tratarse dun prófugo da xustiza.
De todos os xeitos, a súa procura no mar suspendeuse onte, pero patrullas da Garda Civil seguen a súa rastrexo por terra pola comarca do Salnés. Carabelos foi condenado en 2002 polo secuestro do mozo José Radio a quen llo levaron dun local de alterne da Goulla, para trasladalo posteriormente a unha casa de Ribadumia, onde foi torturado. Este caso estivo relacionado co narcotráfico.
