Unha carga de máis de 200 quilogramos de pescada de tamaño antirregulamentario foi comisada nunha operación desenvolvida nun peirao do porto pontevedrés de Marín, segundo informou a Garda Civil.
A operación foi efectuada conxuntamente por axentes da Garda Civil e do servizo de Gardacostas de Galicia tras unha investigación iniciada a principios de novembro pasado, ao descubrir no porto de Bueu unha descarga de pescada de talla inferior á establecida.
Segundo a Garda Civil, a descarga dese tipo de peixe antirregulamentario facíase de madrugada para evitar o control das autoridades.
Os responsables destas descargas deseñaron un dispositivo especial para evitar ser sorprendidos, que incluía unha férrea vixilancia establecida no peirao.
Tras comprobar como traballaban, a Garda Civil e o servizo de Gardacostas despregaron un operativo para interceptar unha das descargas previstas.
O barco pesqueiro que esperaban, con todo, cambiou o rumbo de forma imprevista a última hora e dirixiuse ao peirao de Marín.
Esta manobra, que en opinión das autoridades foi unha fórmula de distracción, foi detectada polos membros do operativo de control e seguimento do barco, que chegaron ao porto de Marín no momento no peixe estaba a ser descargado en dous vehículos.
Os axentes interceptaron os dous coches cando intentaban abandonar do porto e ao ser inspeccionados acharon 201,5 quilogramos de pescada de talla inferior á establecida.
O peixe comisado foi entregado a unha organización encargada dun comedor social e os dous vehículos foron retidos.