Continúa a polémica entre o alcalde de Pontevedra e o Partido Popular a raíz do apoio de Miguel Anxo Fernández Lores ao referendo catalán. O rexedor e o portavoz municipal dos populares, Jacobo Moreira, coincidiron na visita institucional deste martes ás obras do novo edificio xudicial da Parda.
Preguntado respecto diso polos xornalistas, Lores reiterou a súa aposta porque os cataláns poidan votar o 1-O. "Nós non ocultamos a nosa posición nin a nosa defensa do dereito a decidir, de todos os cidadáns, sexan cataláns, galegos ou españois, en xeral. Polo tanto, non hai nada máis que dicir", dixo o rexedor.
Pola súa banda, Jacobo Moreira tachou a súa postura de "moi irresponsable" e afeoulle asinar un manifesto, xunto a outros alcaldes do BNG, en apoio dos rexedores cataláns investigados. "Ese manifesto non o asina como membro do BNG, senón como alcalde de Pontevedra, e creo que non é bo que manche o nome de Pontevedra con estas cousas". E engadiu: "Non entendo como un alcalde de Pontevedra pode declarar persoa non grata a un presidente [en referencia a Mariano Rajoy] que defende a Constitución e ao tempo apoia a quen quere acabar con ela".
Continúan as críticas do PP a Lores polo seu apoio ao referendo catalán
Moreira lamenta que "manche o nome de Pontevedra" mentres o alcalde reitera a súa defensa do dereito a decidir
