Dous caldeiróns varan nas praias do Vilar e Ponzos polo temporal

Dous exemplares de caldeirón, un mamífero da familia dos cetáceos odontocetos, vararon mortos nas praias de Ferrol arrastrados polo forte temporal das últimas horas e permanecen sobre a area en descomposición á espera de que os retiren os servizos municipais.

O primeiro destes mamíferos, tamén chamados baleas piloto, varou hai días no Vilar, e o segundo en Ponzos.

Ambas as praias están na parroquia de Covas, próxima ao cabo Prior.

Desde a Coordinadora para o Estudo dos Mamíferos Mariños de Galicia (Cemma) explicaron a Efe que nesta época do ano, e moi especialmente no mes de abril, son frecuentes os varamentos nas praias galegas pola dinámica das correntes mariñas.

Neste caso, os dous cetáceos levaban mortos algún tempo e as grandes ondas que trouxo o temporal encaixáronos na area.

Desde Cemma apuntaron que, recentemente, no areal de Doniños apareceu unha cuncha de tartaruga laúde, unha das máis grandes.

Os caldeiróns poden chegar a medir ata 6 metros de longo e pesar de 4 a 5 toneladas, aliméntanse de luras e son excelentes mergulladores.

Comentarios