Dous empregados do metro de Moscova foron detidos hoxe pola súa presunta responsabilidade no descarrilamento que causou onte 22 mortos e máis de 150 feridos, informou o portavoz do Comité de Instrución (CI) de Rusia, Vladímir Markin.
"Foron detidos dous sospeitosos de incumprir as normas de seguridade de transporte. Trátase do supervisor de vías do metro de Moscova Valeri Bashkátov e de Yuri Górdov, axudante do supervisor", dixo Markin en declaracións á axencia Interfax.
Agregou que de momento o círculo de sospeitosos limítase aos executores dos traballos, pero advertiu de que o CI ten o propósito de establecer e procesar a todas as persoas involucradas na traxedia, "desde os traballadores ata os directivos que debían controlar o cumprimento das normas de seguridade".
Esta mañá un total de 150 feridos no descarrilamento do tren do metro continuaban hospitalizados, 56 deles graves e extremadamente graves, indicaron fontes dos servizos municipais de urxencia citadas por Interfax.
O Concello de Moscova declarou hoxe día de duelo polas vítimas do accidente, o máis grave en toda a historia do metro da capital rusa. O descarrilamento produciuse en hora punta no tramo entre as estacións Park Pobedy e Slavianski Bulvar cando o tren se dirixía desde o centro de Moscova cara ao arrabalde a unha velocidade de 70 quilómetros por hora.
O Ministerio de Rusia para Situacións de Urxencia anunciou que a circulación de trens no tramo afectado polo accidente podería renovarse hoxe mesmo, aínda que inicialmente se informou de que o servizo se normalizaría a partir de mañá xoves.
