Os Estados Unidos acusaron hoxe o Goberno de Corea do Norte do recente ataque perpetrado por piratas informáticos contra Sony Pictures Entertainment (SPE), e advertiron de que responderá a ese atentado cibernético.
"Responderemos de forma proporcionada (...) no lugar, o momento e o xeito que elixan os Estados Unidos", afirmou o presidente de Estados Unidos, Barack Obama, na súa última rolda de prensa do ano na Casa Branca.
"Tomarei unha decisión baseada no que crea que é proporcionado", insistiu o mandatario sen achegar detalles sobre o alcance das represalias, antes de viaxar a Hawai para empezar as vacacións do Nadal coa súa familia.
O presidente fixo esa declaración pouco despois de que a FBI asegurase que posúe "suficiente información para concluír que o Goberno de Corea do Norte é responsable" do ataque cibernético contra Sony. "Estamos moi preocupados pola natureza destrutiva deste ataque a unha entidade do sector privado e os cidadáns que traballan alí", subliñou a FBI.
No ciberataque, cometido o pasado 24 de novembro, os hackers roubaron -entre outros datos- números de identificación fiscal e partes médicos de máis de 3.000 empregados da compañía.
Ademais, os piratas, que se fan chamar Guardians of Peace (Gardiáns da Paz), apropiáronse de cinco novas películas de Sony, unha das grandes firmas da industria cinematográfica en Hollywood, que filtraron en internet antes de tempo.
Ao parecer, o ataque produciuse como protesta contra o filme The Interview, unha comedia de Seth Rogen e James Franco sobre un complot dos Estados Unidos para asasinar o ditador norcoreano, Kim Jong-un, que o réxime de Pyongyang tachou de ''acto de guerra".
O pasado martes, os Gardiáns da Paz avisaron nun comunicado de que sementarían o terror nos cines que proxectasen o filme e comparou a súa ameaza cos atentados terroristas do 11 de setembro de 2001 nos Estados Unidos.
Esa advertencia logrou o seu obxectivo e Sony anunciou este mércores a cancelación da estrea de The Interview, previsto para o 25 de decembro nos Estados Unidos, xusto despois de que as principais salas de cine do país eliminasen a longametraxe da súa carteleira do Nadal.
Na súa rolda de prensa, Obama manifestou hoxe que a compañía "cometeu un erro" coa supresión da estrea e lamentou que a empresa non lle consultase antes de tomar a decisión. "Non podemos ter unha sociedade na que algúns ditadores nalgún sitio poida empezar a impor censura aquí, nos Estados Unidos", aseverou o presidente. "Se Estados Unidos non responde o ataque pirata contra Sony -advertiu o mandatario-, iso non afectará só ás películas, senón a toda a economía".
Desde SPE, o seu conselleiro delegado, Michael Lynton, contradixo a Obama, con quen discrepou da "idea de que (cancelar a estrea) foi un erro", e asegurou que a compañía non "cedeu" á ameaza dos piratas informáticos. "O presidente, a prensa e o público están equivocados sobre o que sucedeu realmente", declarou Lynton á cadea televisiva CNN, ao culpar os cines pola súa negativa a mostrar a película.
O enfado do Goberno dos Estados Unidos co ciberataque tamén o mostrou o secretario de Estado, John Kerry, quen remarcou que "estes actos ilegais de intimidación demostran o flagrante desprezo de Corea do Norte polas normas internacionais".
O presidente do Comité de Relacións Exteriores do Senado estadounidense, o demócrata Robert Menendez, enviou hoxe unha carta a Kerry para urxirlle a incluír a Corea do Norte na lista de estados "promotores do terrorismo", que elabora o Departamento de Estado, "como consecuencia do ciberataque norcoreano contra Sony Pictures".
O atentado cibernético contra Sony Pictures Entertainment, segundo o diario The Washington Post, representa a primeira intrusión coñecida publicamente de Corea do Norte nas redes informáticas privadas dos Estados Unidos.
Os EE UU prometen responder ''de forma proporcionada'' ao ciberataque de Corea a Sony
