O arxentino Eduardo Berizzo asinou por dúas tempadas co Celta de Vigo, segundo confirmou esta tarde o club celeste. O novo técnico substituirá ao asturiano Luís Enrique, que a semana pasada se despediu da afección viguesa nunha rolda de prensa acompañado do presidente da entidade, Carlos Mouriño.
A páxina weg do equipo anunciaba esta tarde o que xa se viña rumoreando durante as últimas semanas, que será o exjugador do conxunto olívico o que dirixa ao cadro durante as dúas próximas campañas.
Formado como futbolista no Newell's, Toto Berizzo chegou ao Celta no ano 2001, logo de militar nas filas do Atlas, River Plate e Olympique de Marsella. No equipo vigués chegou a converterse nun dos referentes para o celtismo.
Como técnico, Berizzo deu os seus primeiros pasos como segundo adestrador de Marcelo Bielsa na selección de Chile, combinado co que participou no Mundial de Sudáfrica 2010. Tras a súa etapa no combinado nacional chileno, Berizzo estreouse como primeiro adestrador no Estudantes da Prata arxentino, no Clausura de 2011.
O seu seguinte destino foi o O'Higgins de Chile, equipo do que tomou o mando en 2012 e co que gañou os dous primeiros títulos na historia do club, o Torneo Apertura 2013 e a Supercopa 2014.
O novo adestrador celeste será presentado durante os próximos días, aínda que a data aínda non foi confirmada.
