O presidente do Bayern Múnic, Uli Hoeness, desvelou, nun acto celebrado na noite deste xoves en Múnic, que o xa exentrenador do club Carlo Ancelotti puxera na súa contra a cinco xogadores importantes e "iso é algo ao que ninguén sobrevive".
"Carlo lograra pór na súa contra a cinco xogadores importantes e iso é algo ao que ninguén sobrevive. Hai tempo aprendín que non hai inimigo tan perigoso como o inimigo na cama", dixo Hoeness.
En Alemaña informan de que os xogadores molestos co técnico eran Müller, Ribery, Robben, Hummels e Boateng
Os medios de comunicación alemáns consideran que os cinco xogadores cos que Ancelotti tiña un grave distanciamento eran Thomas Müller, Franck Ribery, Arjen Robben, Mats Hummels e Jerome Boateng, aínda que tampouco se descarta que Robert Lewandowski forme parte deste grupo.
Hoeness revelou ademais que a decisión de cesar a Ancelotti tomouse na madrugada do xoves, logo da derrota por 3-0 ante o PSG.
DESPEDIMENTO. O Bayern Múnic anunciara nun comunicado a destitución de Ancelotti.
"O rendemento do noso equipo desde o comezo da tempada non respondeu ás nosas expectativas", dixo o presidente do Consello Directivo do Bayern, Karlheinz Rummenigge, no citado comunicado.
O equipo de asistentes de Ancelotti –Davide Ancelotti, Giovanni Mauri, Francesco Mauri e Mino Fulco– tamén foi destituído
"O partido en París deixou claro que tiñamos que tomar medidas. Hasan Salihamidzic e eu comunicámosllo hoxe –por este xoves– a Carlo nunha conversación seria e sincera", agregou.
O cargo será asumido de forma interina polo segundo adestrador, o francés Willy Sagnol, que chegou ao club a comezos desta tempada.
A goleada encaixada polo equipo bávaro ante o PSG puxo a Ancelotti no centro das críticas pola aliñación inicial que presentou, deixando no banco a Mats Hummels, Arjen Robben e Franck Ribery, pola falta dunha formulación defensiva claro e polo seu debuxo táctico, un 4-3-3 que o Bayern non utilizara desde hai tempo.
Na Bundesliga, ademais, o Bayern marcha actualmente terceiro, tres puntos por baixo do líder, o Borussia Dortmund, e a un punto do Hoffenheim.