O grupo municipal do BNG denunciou este venres que Marín quedará sen un novo servizo a partir do próximo 15 de xullo, data na que o Goberno central ten previsto que entre en vigor a reforma da lei que regula o funcionamento dos rexistros civís. No caso marinense, ademais da perda dun servizo público, segundo os nacionalistas, súmase que os trámites que ata agora se facían na vila terán que realizarse en Pontevedra.
"Tal e como advertiamos cando se presentou ou anteproxecto da lei en abril de 2013, esta reforma traslada as competencias dos rexistros civís aos rexistradores mercantís e da propiedade, de xeito que Marín perde este servizo e os marinenses teremos que desprazarnos a Pontevedra para tramitar rexistros de matrimonios, defuncións, nacementos, ou peticións de nacionalidade, que ata agora faciamos non noso concello", afirma a portavoz do BNG, Pilar Blanco.
A edil nacionalista recorda que "non só o BNG, senón outros grupos da oposición e colectivos sociais de Marín, rexeitamos dende o primeiro momento as pretensións desta reforma, e instamos ao Goberno local a que actuase na defensa dos intereses de dos marinenses". Con todo, matiza que "dous anos despois comprobamos que o único que fixo ou PP foi levantar a man na votación do Pleno para non facer ruído. O Goberno de Rajoy, unha vez que pasen as eleccións municipais, aplicará esta lei e Marín quedará sen rexistro civil, mentres o PP local, coa alcaldesa á cabeza, cala, consinte e tolera que os marinenses perdan un novo servizo como xa pasou antes co de ambulancia durante as noites".
A portavoz nacionalista insiste en que "mentres os veciños de Marín afectados pola perda de ambulancia e pola falta dun centro de saúde se manifestaban a favor da sanidade pública o xoves en Pontevedra, a señora Ramallo asistía a un acto político do PP a poucos metros de distancia, e mentres outros alcaldes dan a cara e defenden os intereses dos seus cidadáns, a alcaldesa de Marín acepta e aplaude as decisións que perxudican ao seu municipio co único afán de manter contentos aos responsables das mesmas dentro do seu partido".
Máis perdas
"Cremos que falamos en nome da gran maioría de marinenses cando afirmamos que non queremos que a nosa vila perda máis servizos", engade Branco López, resaltando que "xa temos que desprazarnos a Pontevedra para ir á maioría das consultas médicas, rehabilitación, para acudir a oficina de emprego ou da seguridade social".
Nesta liña, sinala que "pouco a pouco somos menos administrativamente, detrás da perda dun servizo vai outro, e non podemos consentilo". O BNG considera que "é unha vergoña que dende a responsabilidade de ostentar a Alcaldía se cale e outorgue en temas desta importancia e nin sequera se tome a molestia de informar á cidadanía dos seus dereitos, talvez coa ilusión de que non nos deamos por decatados ata que pasen as eleccións".
