A portavoz do grupo municipal do BNG no Concello de Vigo, Iolanda Veloso, esixiu hoxe a asunción de responsabilidades "políticas" pola imputación do concelleiro de Parques e Xardíns, Limpeza e Distritos, Ángel Rivas (PSOE), e que o alcalde, Abel Caballero, "non se esconda".
Veloso recalcou en rolda de prensa que o BNG "ten claro" que cando un dos seus cargos públicos é imputado, "dimite", e que cada partido "debe responder das súas decisións en función das súas posicións ideolóxicas e políticas".
A portavoz nacionalista distinguiu entre o proceso xudicial e o respecto á presunción de inocencia das "responsabilidades políticas", empezando por dar explicacións e non limitarse a comparecencias sen preguntas como a de hoxe por parte de Rivas e o seu compañeiro de goberno Carlos López Font.
Abundou en que a imputación do edil, naquel momento secretario de organización do PSOE de Vigo, "pon en cuestión a xestión e as decisións políticas sobre recursos públicos", e recordou que Caballero tivo dous anos para "defender aos seus concelleiros" e non o fixo. "Cando hai un problema escóndese. Non dá a cara nin dá as explicacións políticas ás que está obrigado", aseverou.
O PP pide celeridade
O grupo municipal do PP no Concello de Vigo pediu hoxe "celeridade" e "transparencia" na aclaración dos motivos que levaron á imputación do concelleiro socialista. O portavoz dos populares vigueses, José Manuel Figueroa, sinalou en rolda de prensa que os cidadáns "merecen unha explicación e hai que darlla", pero eludiu esixir dimisións ou outro tipo de responsabilidades políticas, o que deixou en mans do propio edil imputado e do alcalde, Abel Caballero.
"A responsabilidade é do goberno, que ten que tomar unha decisión", aseverou Figueroa, quen presumiu de que no PP "actuamos en consecuencia". Preguntado por se un dos seus compañeiros de filas resultase imputado tería que dimitir, contestou que no PP hainos que deron este paso -ou os forzaron- e outros que non, e que "depende do motivo".
Figueroa deduciu que se o caso chegou aos tribunais é que a denuncia política que fixo o PP hai dous anos sobre a subcontratación de obras á empresa da que Rivas era xerente "tiña sentido", e considerou que agora "sería un erro dar as nosas opinións". "Non xudicializamos nunca a vida política", proclamou.
Para rematar, destacou que o grupo que preside fixo o seu labor de oposición "dignamente" con denuncias de supostas irregularidades por parte do goberno local, sen menoscabo de que seguirá tendo "boas relacións" co mesmo para sacar adiante os "grandes proxectos" da cidade.
